Thursday, May 17, 2007

နို့ထောက်ကူ ပစ္စည်း

ကလေး နို့တိုက်တဲ့ အခါမှာ သုံးတဲ့ Accessories တွေ အကြောင်းမို့လို့ ဒီလို ခေါင်းစဉ် တပ်လိုက်တာပါ။ ကလေး မိဘ ဖြစ်ဖူး၊ ဖြစ်နေတဲ့ သူတွေ အတွက်တော့ အဆန်း မဟုတ်ပေမဲ့ ဖြစ်မဲ့ သူတွေ အတွက်တော့ နည်းနည်း သိရတာပေါ့။ ပြီးတော့ မြန်မာပြည်က အမျိုးတွေလည်း ဖတ်လို့ ရတာပေါ့။ ကလေးနို့ဘူး၊ နို့မှုန့်တွေက တော့ အထူးအဆန်း မဟုတ်ပါဘူး။ မြီးကောင်ပေါက်လေးပဲ ဖြစ်ဖြစ်၊ အပျိုကြီး၊ လူပျိုကြီးပဲ ဖြစ်ဖြစ် ကလေးမွေးရင် ဒါတွေလိုတယ်ဆိုတာ သိတာပေါ့။ ဒါတောင် ကလေးမမွေးခင်က နို့ဘူး တစ်ဘူးပဲ ကြိုဝယ်ထာတဲ့ အကြောင်းကို ပြောမိလို့ ရုံးက ကလေးမိခင်တစ်ဦးက ဟက်ဟက်ပတ်ပတ် ရယ်ပါသေးတယ်။ `ဘယ်လိုလုပ် တစ်ဘူးနဲ့ လောက်ပါ့မလဲ´တဲ့။ သိတော့ သိပါတယ်။ လက်ဆောင်တွေ ရမယ်ဆိုတာ သိလို့ တစ်ဘူးပဲ ၀ယ်ထားတာ။ မြန်မာ အယူလည်း ရှိပါတယ်။ ကလေး မမွေးခင် ပစ္စည်းတွေ ကြိုမ၀ယ်ရဘူးဆိုတာ။ အဲ့ဒါကြောင့်တော့ မဟုတ်ပါဘူး။ ကြိုမ၀ယ်ထားတာ မှန်ပါတယ်။ ဒီမှာက လိုလည်း ပြေးဝယ်လို့ ရနေတာပဲ။ အလွန်ဆုံးကြာ ၃-၄ နာရီပေါ့။ လိုမှ ၀ယ်တော့ မှားဝယ်ထားတာ မရှိတော့ ပါဘူး။ အကုန် ကွက်တိပါပဲ။

နိုဘူးက ၀ယ်ရတာလွယ်ပေမဲ့ နိုဘူးမှာ တတ်တဲ့ နို့သီးခေါင်း (teat) က ရွေးရတာ ခက်မယ်လို့ ဘယ်သူမှ ထင်မှာ မဟုတ်ပါဘူး။ ကိုယ်လည်း မထင်ခဲ့ ပါဘူး။ နို့သီးခေါင်းတွေက ပုံစံမျိုးစုံနဲ့ အသားမျိုးစုံ ရှိပါတယ်။ ဆေးရုံမှာတုန်းက Partial Feeding (အမေနို့ရော နို့ဘူးပါတိုက်တာ) လုပ်မယ်လို့ ကျွန်တော်တို့က ကြိုပြောထားတဲ့အတွက် အထူးစပါယ်ရှယ် နို့သီးခေါင်းနဲ့ တိုက်ပါတယ်။ အဲ့ဒီ နို့သီးခေါင်းမျိုးကတော့ တစ်ခါမှ မမြင်ခဲ့ဖူးပါဘူး။ Nuk ပါ။ ခေါင်းထိပ်ကလည်း မြင်ဖူးထားတဲ့ ပုံတွေလိုမျိုး မဟုတ်ပါဘူး။ အပေါက်ကလည်း ထိပ်တည့်တည့်မှာ မဟုတ်ပါဘူး။ လက်ညှိုးကို စိတ်ကူးကြည့်မယ်ဆို အပေါက်က လက်သည်း နေရာမှာပါ။ ထိပ်က အပေါက်လေး အပြင် အလယ်ခေါင်လောက်မှာလည်း အချိုင့်လေးနဲ့ အပေါက်ကလေး ရှိပါတယ်။ လေ၀င်ဖို့ပါ။ သူက Patented (Patent Number – 4505398) ပါ။ နို့သီးခေါင်း အကြောင်းနဲ့ အသေးစိပ်ကို Patent မှာ ဒီလို ဖော်ပြထားပါတယ်။ အဲဒီ နို့သီးခေါင်းက မွေးကင်းစ (အမေနို့တိုက်မယ့်) ကလေးတွေ အတွက် အကောင်းဆုံးပါပဲ။ လေမခိုနေတာကို ကြိုက်တဲ့ အပြင် ကလေး စို့ရတာ လွယ်တာကိုလည်း ကြိုက်ပါတယ်။ ထူးဆန်းတာက ကလေးက စို့တဲ့ အခါ (လူကြီးတွေ ပိုက်နဲ့ အအေးသောက်သလို) စုပ်ရတာ မဟုတ်ပါဘူး။ နို့သီးခေါင်း ထိပ်ကို လျှာဖျားလေးနဲ့ ဖိဖိပြီးသောက်ရတာပါ။ ပါးစပ်လေးကို ဟပြီး လျှာလေးကို ရှေ့ကို ထုတ်လိုက် သွင်းလိုက်လုပ်သလိုမျိုးပေါ့။ (လျှာထုတ် ပြသလောက်တော့ ရှည်စရာ မလိုပါဘူး)။ ဗိုက်ထဲမှာကတည်းက လျှာ ထုတ်လိုက် သွင်းလိုက်လုပ်နေတဲ့ သမီးအတွက်ကတော့ အလွန်အဆင်ပြေပါတယ်။ (Ultra Sound နဲ့ကြည့်တုန်းက သူ အဲလို လုပ်နေတာကို ကောင်းကောင်းကြီး မြင်ဖူးထားပါတယ်။)


နို့ဘူးပြုတ်ဖို့ အိုးလိုတဲ့ အကြောင်း၊ အသစ်ကို သပ်သပ် သုံးသင့်တယ် ဆိုတာကို အတွေအကြုံ ရှိဘူးပြီးသူတွေ ပြောမှ အသေအချာ သိရပါတယ်။ ပိုးသတ်တဲ့ အိုးတွေ (sterilizer) တွေကို လိုက်ကြည့်တော့ ဈေးကကြီးတာနဲ့ ဘာဝယ်ရမှန်း မသိဖြစ်နေပါတယ်။ အသိ တစ်ယောက် ကတော့ အကြံပေးပါတယ်။ Rice Cooker တစ်လုံး အသစ် ၀ယ်သုံးတဲ့။ သူ့အကြံ မဆိုးဘူး လို့တွေးပေမယ့် ဘာလိုလိုနဲ့ မ၀ယ်ဖြစ်ပြန်ဘူး။ ဒီလိုနဲ့ ကလေးမွေးမှပဲ ကလေရဲ့ ဦးလေး (ကျွန်တော့် ညီ) က sterilizer တစ်လုံး လက်ဆောင် ပေးပါတယ်။ Avent Express II Steam Microwave Steam Sterilizer ပါ။ သူက ရိုးရှင်းပေမဲ့ တော်တော် သုံးလို့ကောင်းပါတယ်။ Power Supply တွေ ဘာတွေ မပါပါဘူး။ (ရေဆေးလို့ ကောင်းတာပေါ့)။ ကော်ဇလုံ ပက်ပက်ရယ်၊ အဖုံးတစ်ခု ရယ်ပဲ ဆိုပါတော့။ ရိုးရိုး Plastic တော့ ဘယ်ဟုတ်မလဲ။ Microwave ထဲ ထည့်လို့ရတဲ့ ဟာမျိုးပေ့ါ။ ဇလုံထဲ ကို ရေနည်းနည်း ထည့် အဲဒီပေါ်မှာ ခင်းထားတဲ့ အပေါက်လေးတွေ ပါတဲ့ ကော်ပြားတစ်ခု ပေါမှာ နို့ဘူးတွေစီပြီး၊ မှောက်ထောင်ပြီးထည့် အပေါ်က အဖုံးကို အလုံဖုံးပြီး Microwave ထဲကို 4-5 မိနစ်လောက် ထည့်ရတာပါ။ အထဲမှာ ရေတွေက ပွက်ပွက်ဆူ အငွေ့ပြန်ပြီးတော့ ပေါင်းသလိုဖြစ်သွားတာပါ။ နို့ဘူးဆေးတာနဲ့ ပေါင်းတာနဲ့မှ အားလုံး ၁၅ မိနစ်လောက်ပဲ ကြာပါတယ်။ ပေါင်းပြီးလို့ ရှိရင် နို့ဘူးတွေကို အဲဒီထဲမှာပဲ ထားတော့ နို့ဘူးတွေ ထားဖို့ နေရာ သန့်သန့်လည်း သပ်သပ်ရတာပေါ့။ Sterilizer နဲ့ အတူတူ နို့ဘူး ၄ ဘူး၊ နို့ဘူးဆေးတဲ့ Brush တစ်ခုပါတော့ တော်တော်တန်တယ် ပြောလို့ ရပါတယ်။

နောက်တစ်ခု ထပ် လိုလာတာကတော့ Breast Pump ပါ။ နို့တွေ အရမ်းစုလာတဲ့ အခါကျရင် ကလေးအမေမှာလည်း မသက်မသာဖြစ်ရပါတယ်။ အဲဒီအခါကျရင် ညှစ်ထုတ်ပစ်ဖို့ပါ။ ကျွန်တော့် အမေ ပြောတာတော့ လက်နဲ့ ညှစ်ရတာ တော်တော် နာတယ် ဆိုပဲ။ တစ်ခါတစ်လေ ညှစ်ပြီးသားတွေကို သိမ်းထာပြီး ပြန်တိုက်ပါတယ်။ Pigeon ကထုတ်တဲ့ Pump ကို ၀ယ်သုံးပါတယ်။ Manual ပဲ ၀ယ်ပါတယ်။ နို့မှာ စွပ်ပြီး ရေတုံကင်လို Lever လေးကို ညှစ်ရတာပါ။ ၁၀ မိနစ်လောက်ညှစ်ရင် ၄၀-၅၀ မီလီလီတာလောက် ရပါတယ်။ Japan Made ဆိုတော့ အသားအနား ကောင်းပေမယ့် သုံးရတာတော့ သိသိသာသာကြီး အကောင်းကြီး မဟုတ်ပါဘူး။ ပုံမှန်ပါပဲ။ နို့တစ်ဘက်မှာတော့ သိပ် အဆင်မပြေပါဘူး။ သူ့အ၀က နို့မှာ ကောင်းကောင်းကြီး ကပ်မနေတော့ လေမလုံတာနဲ့ ကောင်းကောင်း ညှစ်လို့မရပါဘူး။ ဆေးရတာလည်း သိပ်မလွယ်ပါဘူး။ သေသေချာချာ မဆေးရင် နို့ကျန်တွေ ကပ်နေနိုင်ပါတယ်။ တခြားတံဆိပ်တွေ (Avent တို့လိုမျိုး) တော့ ဘယ်လိုနေမယ် မသိပါဘူး။ ဒီဟာကတော့ အကောင်းစားတွေထဲမှာ ဈေးနည်းနည်း သက်သာတဲ့ ဟာပါ။ ဒါတောင် ၉၀ S$ ပေးလိုက်ရပါတယ်။ ဘယ်တံဆိပ်ပဲ ၀ယ်ဝယ် Manual ပဲ ၀ယ်သင့်ပါတယ်။

တခြား သေးသေး မွှားမွှားလေးတွေလည်း လိုပါသေးတယ်။ နို့တိုက်ရင်း သုံးဖို့ Tissue Paper ကောင်းကောင်း (ကောင်းကောင်းဆိုတာ 3 Ply လိုမျိုးကို ပြောတာပါ၊ အရည် သုတ်လို့ ရတာမျိုးပေါ့)၊ အမေနို့နဲ့ ကလေးပါးစပ် အပြင် သုတ်ဖို့ Wet Tissue လိုမျိုး၊ ကလေး ပါးစပ် အထဲက နို့ချိုးတွေ ရှင်းဖို့ Oral Care Tissue လိုမျိုး နို့ဘူးဆေးဖို့ ဆပ်ပြာရည်လိုမျိုး (ဒါတော့ မ၀ယ်ဖြစ်ပါဘူး၊ အိမ်သုံးနဲပဲ ဆေးပြီး ရေစင်အောင် ဆေးလိုက်တာပဲ) တွေပေါ့။ ပြောရမယ် ဆိုရင်တော့ ချဲ့ရင် ချဲ့သလောက်ပေ့ါ။ ကျွန်တော်တို့ကတော့ ဒီလိုပဲ ကြီးလာတာပါပဲ။ အခုခေတ် ကလေးတွေကိုက ကံကောင်းတာပါ။

3 comments:

imaginary clouds no2 - 5/19/07, 1:09 PM

hey anty myint(andy*)

thanks a lot,

Anonymous - 9/15/08, 4:26 AM

Thanks a lot for this post. Is there any other posts similar to this one?

Andy Myint - 9/15/08, 5:14 PM
“နို့ပူ နို့အေး” နဲ့ “နို့စာရေးမ” Post တွေကို ညွှန်းလိုပါတယ် စာဖတ်သူ..

Post a Comment

Many thanks for dropping a comment…

Film