Monday, May 28, 2007

ဘို တေဇောဘမ်း

ကလေးမွေးပြီးတော့ ဆေးရုံက မဆင်းခင် ကလေးပြုစုနည်း (ရေ ဘယ်လို ချိုးလဲ၊ နို့ ဘယ်လို တိုက်လဲ) အခြေခံကို ဆေးရုံက သရုပ်ပြပါတယ်။ နာ့စ်မကြီးက သေသေချာချာ ရှင်းပြပါတယ်။ သရုပ်ပြဖို့ အရုပ်ကလေး ရှိပေမယ့် ဘိုစုံတွဲက သူတို့ ကလေးနဲ့ ပြစေပါတယ်။ ရေချိုးပြီး အနှီးမပတ်ခင် Diaper Rush Cream လိမ်းပါတယ်။ Diaper Rush Cream ဆိုတာ ကလေးတွေ အနှီး အကြာကြီး ပတ်ထားရင် လှောင်ပြီး လောင်တတ်လို့ လိမ်းရတာမျိုးပါ။ ကျွန်တော်တို့က ကလေးသုံးဆို ဘာဝယ်ရမှန်း မသိတော့ Johnson ကပဲ ၀ယ်ထားပါတယ်။ Johnson က Diaper Rush Cream က သွားတိုက်ဆေးလို ဖြူဖြူ Paste လေးတွေပါ။ နာစ်မကြီးဆီမှာ ရှိတာလည်း အဲလိုမျိုးပါပဲ။ နာ့စ်မကြီးက သူ့ Cream ကို လိမ်းမယ် အလုပ်မှာ ဘိုမကြီးက သူတို့ဟာ လိမ်းပါဆိုပြီး လှမ်းပေးတယ်။ ကြည့်လိုက်တော့ တွေ့ဖူးနေကျ ဖြူဖြူ Paste လေးတွေ မဟုတ်ပါဘူး။ သွားတိုက်ဆေး ဗူးလိုထဲမှာလည်း မဟုတ်ပါဘူး။ အ၀ကျယ် ပုလင်းထဲက ၀ါဝါ ပြစ်ပြစ်(ခဲခဲ)ပါ၊ ဖယောင်းခဲ လိုမျိုးပေါ့။ အဲဒါနဲ့ ကျွန်တော်တို့ လင်မယားလည်း ဘာတွေလဲ၊ ဘာတံဆိပ်လည်းဆိုတာ သိချင်သွားပါတယ်။ ထပြီးတော့တော့ မကြည့်လိုက်ပါဘူး၊ လူတွေလည်း အမျာကြီးဆိုတော့။ ဒီလိုနဲ့ နေလာတာ ကလေး တစ်လသားကျတော့ ဗိုက်နာရင် ရေနံဆီလိမ်းရမယ်၊ ရေနံဆီက ဒီမှာ ဘယ်လိုလုပ် ရှိပါ့မလဲ၊ ရန်ကုန်မှာတောင် ရွှေထက်ရှားတယ်ဆိုပဲ။ ဒါနဲ့ ကျွန်တော့် အမေက ဖျတ်ကနဲ အကြံရသွားတယ်။ ရေနံဆီ မရလည်း Vaseline လိမ်းလို့ရတယ်တဲ့။ သူမကလည်း ထောက်ခံတယ် Vaseline ဆိုတာ Petroleum Jelly သက်သက်ပဲတဲ့။ Vaseline လိမ်းတာက ရေနံဆီလိမ်းသလိုပဲပေါ့။ အဲဒါနဲ့ Vaseline သွားဝယ်ပြီး ပုလင်းကိုတွေ့တော့မှပဲ ဘိုတွေက သူတို့ ကလေးကို လိမ်းပေးတာ Vaseline ဆိုတာ သဘောပေါက်သွားတယ်။

တကယ်တော့ Vaseline ဆိုတာ Brand ပါ။ အဲဒီ Brand က နာမည်ကြီးလွန်းလို့ လူတွေက Petroleum Jelly ဆို Vaseline လို့ပဲ ခေါ်တော့တယ်။ ဥပမာပြောရရင် မြန်မာပြည်မှာ Cereal တွေ Oats တွေကို `ကွေကာဥ(အုတ်)´ လို့ ခေါ်သလိုမျိုးပေါ့။ `Quaker´ တံဆိပ် `Oats´ဟာ သုံး(ခဲ့)လွန်းလို့ Cereal ဆိုရင် `ကွေကာဥ´ လို့ပဲခေါ်ကြတော့ပါတယ်။ အဲဒီ Quaker Oats ဗူး/အိပ် မှာပါတဲ့ ပုံဟာ `Quaker´ဂိုဏ်းသားရဲ့ ပုံပါ။ `Quaker´တို့ `Shaker´တို့ အကြောင်းကိုတော့ ဒီမှာ ကြည့်နိုင်ပါတယ်။ ထားပါတော့။ Vaseline တံဆိပ်ကလည်း သီပေါမင်း ပါတော်မမူခင် (၁၈၇၂) ကတည်းက မှတ်ပုံတင်ထားတာဆိုတော့ လူတွေ အရိုးစွဲနေတာ မမှားပါဘူး။ Vaseline ဆိုတာ ဂျာမန်လိုဆိုရင် `ရေ´ ဆိုတဲ့ စကားလုံး၊ ဂရိလိုဆို `ဆီ´ ဆိုတာက နေ ဆင်းသက် လာတာလို့ ယူကြပါတယ်။

Vaseline ပုလင်းမှာ ဆိုထားတာတော့ မတော်တဆ လှီးရှတာတို့၊ အသားအရေခြောက်တာတို့၊ Diaper Rush တို့ အတွက် သုံးလို့ရတယ်တဲ့။ အင်း...သေချာသွားပါပြီ ဟိုကလေးလေးကို လိမ်းပေးတာ ဒါဆိုတာ။ ကျွန်တော်တို့ကတော့ ခြေဖ၀ါးကို လိမ်းပေးပါတယ်။ ရေနံဆီ လိမ်းသလိုမျိူးပေါ့။ အမေကလည်း သူသုံးဖူးတယ်တဲ့။ အသားတွေ အရမ်းပက်ပြီး အရေပြားတွေ ပက်ကြား အက်နေတုန်းကတဲ့။ အရမ်း ထိရောက်တယ် ဆိုပဲ။ ဟုတ်တာပေါ့ Vaseline က အလှကုန် ပစ္စည်းတွေမှာ လှိုင်လှိုင် သုံးတဲ့ဟာပဲ။ ဒီ Petroleum Jelly နဲ့ Glycerin က အလှကုန် တွေမှာ သုံးတာလေ။ ဒီကောင်က ရေမှာ မပျော်ဝင်ဘူး ရေကိုလည်း မစုပ်ဘူး။ Glycerin ကတော့ ရေကို စုပ်တယ်။ နှစ်ခုလုံးကတော့ လိမ်းထာရင် အရေပြားပေါ်မှာ စေးကပ်ကပ်နဲ့။

နောက်ပြီး Vaseline ကို အနာသေးသေးအတွက်၊ ခြေသည်းမှို တက်တာတို့ ဘာတို့ အတွက် လိမ်းကြပါတယ်။ တကယ်တော့ Vaseline က အနာတွေကို ပျောက်စေတဲ့ အစွမ်း မရှိပါဘူး။ သူက ရေမှာလည်း မပျော်ဝင်၊ အရေပြားထဲလည်း စိမ့်မ၀င်တော့ အနာကို လုံအောင် ဖုံးထားသလိုဖြစ်ပြီး ပိုးတွေဘာတွေ ထပ်မ၀င်တော့ အနာက လွယ်လွယ်ကျက်သွားတာပါ။ ဒါပေမယ့် အပူလောင်နာပေါ်တော့ မလိမ်းရပါဘူး။ အပူတွေလှောင်နေပြီးတော့ ပိုဆိုးသွားပါလိမ့်မယ်။ ကလေး နှာခေါင်းပိတ်တာ အတွက်လည်း မသုံးသင့်ပါဘူး (နှာခေါင်းဝမှာ မလိမ်းရပါဘူး)။ နှာခေါင်းထဲ ၀င်သွားရင် ပိုဆိုးစေပါတယ်။ အဆုပ်ထဲ ၀င်သွားရင်လည်း Petroleum အမှုန်လေးတွေက မကောင်းပါဘူး။ ရင်ဘက် အအေးပက်တာတို့ ဘာတို့ဆိုရင်တော့ ရင်ဘက်ကို လူးပေးလို့ရပါတယ်။

တကယ်တော့ Vaseline က ဘိုတွေအတွက် အိမ်တိုင်းဆောင်ထားရတဲ့ `တေဇောဘမ်း´ပါပဲ။

3 comments:

Anonymous - 4/10/10, 1:19 AM

ကွေကာဥ အကြောင်း၊ ခုမှ သိတော့တယ်။

Anonymous - 6/6/10, 11:33 AM

I just read this and told my wife, she want to go and buy from Gurdian right now..hee..hee cos my girl is having block nose

TMH

Anonymous - 4/1/11, 3:05 PM

Correction : Diaper Rash ( not Rush )

Post a Comment

Many thanks for dropping a comment…

Film