Sunday, December 16, 2007

ချက်ကြိုး

မနေ့က ဒီကာတွန်းလေး သွားတွေ့ပြီး သမီးလေး မွေးတုန်းက ချက်ကြိုးကို ဖြတ်ပေးရတာ သတိ ရသွားတယ်။ အဲဒီတုန်းက ကျွန်တော့်မှာ ဆရာဝန်က ကတ်ကြေးပေးလို့သာ တုန်တုန် တုန်တုန်နဲ့ ညှပ်လိုက်တယ် တကယ်တော့ ဘာလုပ်ရမှန်းကို မသိပါဘူး။ Rod Stewart သူ့သမီးလေး မွေးတုန်းက အကြောင်းပြန်ပြောတော့ `ချက်ကြိုးကို ကျွန်တော်ကိုယ်တိုင် ဖြတ်ပေးခဲ့တာဗျ´လို့ ၀င့်ဝင့် ကြွားကြွား ပြောတာကို မဟေသီမှာ ဖတ်လိုက်ရသေးတယ်။ ချက်ကြိုးက သန္ဓေသားအတွက် အရေးကြီးပါတယ်။ ကလေးအတွက် လိုအပ်တဲ့ အောက်ဆီဂျင်နဲ့ အဟာရကို ချက်ကြိုးကနေပဲ သယ်ပေးရတာပါ။ ချက်ကြိုးမှာ သွေးလွှတ်ကြော (Artery)နှစ်ခုနဲ့ သွေးပြန်ကြော (Vein) တစ်ခုပါပါတယ်။ ပုံမှန်ဆို သွေးလွှတ်ကြောတွေက အောက်ဆီဂျင်ပါတဲ့ သွေးကို သယ်ပေးပေမယ့် ချက်ကြိုးက သွေးလွှတ်ကြောကတော့ ကလေးဆီက ပြန်လာတဲ့ အောက်ဆီဂျင်မဲ့ သွေးတွေကို သယ်လာပေးတာပါ။ နှလုံးကနေ အဆုတ်ကို သွေးညစ်တွေ (အောက်ဆီဂျင် မရှိတော့တဲသွေးတွေ) သယ်သွားတဲ့ သွေးလွှတ်ကြောလို့ပါပဲ။ အဆုတ်ထဲမှာမှ အောက်ဆီဂျင်တွေ ရပြီး အဆုတ်သွေးပြန်ကြောကနေ သွေးသန့်တွေ ပြန်သယ်လာသလို ချက်ကြိုးက သွေးပြန်ကြောကလည်း ကလေးအတွက် အောက်ဆီဂျင် ပါတဲ့ သွေးတွေကို သယ်သွားပေးတာပါ။ အချင်းနဲ့ လွယ်မွေးတဲ့ နို့တိုက် သတ္တ၀ါတွေမှာတော့ ချက်ကြိုးက အဓိကပါပဲ။ ချက်ကြိုး တိုလို့ ခွဲမွေးလိုက်ရတာတို့၊ ချက်ကြိုးက ကလေးရဲ့ လည်ပင်းမှာ ပတ်နေတာတို့ကို ကြားဖူးနေပေမယ့် ကံကောင်းလို့ သမီးလေးမှာတော့ အဆင်ပြေပါတယ်။

ဒီလောက် အရေးကြီးတဲ့ ချက်ကြိုးကို အခုခေတ်မှာ ကြိုးမဲ့တွေ ခေတ်စားလွန်းလို့ ထိထိမိမိ သရော်ထားတဲ့ ကာတွန်း ဆရာကိုတော့ မချီးကျူးဘဲ မနေနိုင်ပါဘူး။ တော်တော်များများက အိမ်မှာ Cordless Phone တွေ သုံးနေပေမယ့် ကျွန်တော်တို့ အိမ်မှာတော့ အသုံးနည်းလို့ ၁၀ လောက်ပေးရတဲ့ ပေါပေါပဲပဲ ဖုန်းကို တပ်ထားပါတယ်။ အဲ.. ကွန်ပြူတာက Mouse ကိုတော့ ကျွန်တော်က ဘယ်သန်တော့ ဘယ်ဘက်မှာ ထားသုံးလိုက် မိန်းမက သုံးတော့ ညာဖက် ပြန်ရွှေ့လိုက်နဲ့ ကြိုးတွေက လိမ်ကုန်တာနဲ့ Mouse ကိုတော့ Cordless သုံးရပြန်တယ်။ အခုနောက်ပိုင်း အင်တာနက် ချိတ်တဲ့သူတွေ (အထူးသဖြင့် စင်္ကာပူမှာ တွေ့ဖူးတာ)တစ်အိမ်ထဲမှာ လူအများနဲ့ ရှယ်သုံးကြတော့ Wireless Router တွေသုံးကြတယ်။ စင်္ကာပူမှာကတော့ လေဆိပ်မှာမှ မဟုတ်ပါဘူး ကုန်တိုက်တွေကနေ ကော်ဖီဆိုင်၊ ဘာဂါဆိုင်အထိ Wireless Internet (Wi-Fi) တွေ ရနေတော့ အိမ်မှာ သုံးကြတာ အဆန်းတော့ မဟုတ်ပါဘူး။ အိမ်သုံးပစ္စည်းတွေဖြစ်တဲ့ ဖုန်စုပ်စက်တို့၊ မွှေစက် (Blender) တို့လည်း Cordless ဖြစ်လာတယ်။ ဘယ်ဟာပဲ ဖြစ်ဖြစ် Cordless ပစ္စည်းတွေကတော့ လိုအပ်တဲ့ ဓါတ်အားအတွက် ဘက်ထရီ ကောင်းကောင်း တပ်ထားမှ အလုပ် လုပ်ပါမယ်။

လူတွေ (သန္ဓေသားလေးတွေ) ရော Cordless ဖြစ်ရင် ဘယ်လို ဖြစ်မလဲ။ ကြက်ကလေး ငှက်ကလေးတွေလိုပဲ ကြက်ဥထဲမှာ အကာအနှစ်တွေ စားပြီး ကြီးပြင်း ပေါက်ဖွားရမလား။ တကယ်တော့ လူသန္ဓေသားလေးတွေလည်း စစချင်းမှာ အဲဒီလို အနှစ်အကာတွေကို စားပြီးမှ ချက်ကြိုးက ဖြစ်လာတာပါ။ (သြစတြေးလျရဲ့ အမှတ်အသား တစ်ခု ဖြစ်တဲ့) သားပိုက်ကောင်တို့၊ ကိုအာလာ (Koala) တို့မှာလည်း သန္ဓေသားလေးတွေဟာ ဒီလိုပဲ အကာအနှစ်လေးတွေ စားပြီး စ လာပေမယ့် ချက်ကြိုးက မရှိတော့ ကိုယ်ဝန်လွယ်ချိန် တိုတိုလေးနဲ့ မွေးလိုက်ရပါတယ်။ ကံကောင်းချင်တော့ ဒီလို အကောင်တွေ (Marsupial) ရဲ့ မိခင်တွေဟာ ၀မ်းဗိုက်မှာ အိတ်လေး (Marsupium) ရှိပါတယ်။ ကလေးစို့ဖို့ နို့သီးခေါင်းဟာလည်း အဲဒီ အိတ်ထဲမှာပဲ ရှိပါတယ်။ မဖွင့်ဖြိုးသေးတဲ့ သူဘာသာ ဘယ်လိုမှ အသက်ရှင် မရပ်တည်နိုင်တဲ့ ကလေးပေါက်စလေးဟာ မွေးပြီးတာနဲ့ အဲဒီ အိတ်လေးထဲမှာ နေပြီး နို့သီးခေါင်းလေးကို မြဲနေအောင် စုပ်ထားပါတယ်။ နို့သီးခေါင်းဟာလည်း ကလေးပါးစပ်ထဲမှာ ကားပြီး ကြီးလာတော့ မကျွတ်နိုင်တော့ပါဘူး။ ဒီလို နည်းနဲ့ ကလေးငယ်လေးဟာ ဖွံဖြိုးကြီးထွားပါတယ်။ ကလေးငယ်လေးဟာ သူ့ဘာသူ လှုပ်ရှားသွားလာ စားတတ်နေထိတိုင်အောင် အိတ်ထဲမှာ နေနေပါတယ်။

လူတွေက ချက်ကြိုး ရှိတော့ အဲဒီ ချက်ကြိုး အကြောင်းရှာပြီး စီးပွားရေး လုပ်တာကလည်း ရှိသေးတယ်။ Cord Blood Bank ဆိုပြီးတော့ ကလေးမွေးလာတဲ့ အချိန်မှာ ထွက်လာတဲ့ အဲဒီ ချက်ကြိုးထဲက သွေးတွေကို သိမ်းထားပေးတာတဲ့။ လစဉ်ကြေး မှန်မှန်ပေးပေါ့၊ သူတွေ ထိန်းသိမ်းထားပေးမယ်။ ဒီသွေးတွေကို ဘာပြန်လုပ်ရမလဲ ဆိုတော့ ဒီသွေးတွေဟာ Stem Cell လို့ ခေါ်တာတွေပါလို့တဲ့။ Stem Cell ဆိုတာ ပိုကာဒေါင်းရင် ဂျိုကာ ပါသလိုပဲ တခြားတစ်လျှူးတွေ ပြန်ဖြစ်နိုင်လို့ပါတဲ့။ ဥပမာ ကလေးက သွေးကင်ဆာလိုမျိုး ဖြစ်လို့ရှိရင် သွေးထုတ်ပေးတဲ့ ရိုးတွင်ခြင်ဆီတွေ လိုအပ်ရင် ပြန်လုပ်နိုင်တယ် ဘာညာပေါ့။ ကျွန်တော်တို့ရဲ့ ၀န်ကြီးချုပ်ကြီးသာ မွေးစတုန်းက ဒီလို Cord Blood Bank မှာ သွေးစုထားခဲ့ရင် သူ့ညီနောက်ကို လိုက်သွားရမှာ မဟုတ်ဘူး။

3 comments:

MyMetro - 12/16/07, 10:09 PM

ချက်ကြိုးနဲ့ပတ်သက်ပြီး ဗဟုသုတ ရပါတယ်။ နောက်ဆုံး အပိုဒ်ကို သဘောကျတယ်။ :D

Anonymous - 12/30/07, 5:50 AM

Your baby is with her own fence, playground & car now..so good:0
She becomes more cute & beautiful with big circle eyes as age gets older.
Wishing your family with peace, happiness & success in new year.

Andy Myint - 12/30/07, 11:25 AM
Thanks.. you too have a prosperous 2008 ahead..

Post a Comment

Many thanks for dropping a comment…

Film