Thursday, December 31, 2009

၂၀၁၀ အတွက် ဒိန်ချဉ် နောက်တစ်အိုး

အိမ်မှာ ကိုယ့်ဘာကိုယ် ဒိန်ချဉ်လုပ်ချင်ရင် လွယ်ပါတယ်တဲ့။ နို့ကို ကျိုပြီး အအေးခံ၊ ပြီးရင် ဒိန်ချဉ် ၂ ဇွန်းလောက် ထည့်လိုက်ပါ။ တစ်ညလောက် သိပ်ထားလိုက်ရင် နောက်နေ့ မနက်ကျရင် ဒိန်ချဉ် တစ်အိုးရပါလေရော။ နောက်တစ်အိုး ထပ်တည်ချင်ရင်လည်း ဒိန်ချဉ် နည်းနည်းလောက် ချန်ထားပြီး နို့အသစ်ထဲ့ ထပ်ထည့်လိုက်ရင် ဒိန်ချဉ် ထပ်လုပ်လို့ ရပါသေးတယ်။ ဒီလိုနဲ့ ဒိန်ချဉ်တွေ တစ်အိုးပြီး တစ်အိုး လုပ်လို့ ရသွားပါလိမ့်မည်။ ဒါပေမယ့် တကယ်လုပ်ကြည့်ရင် ပြောသလောက် မလွယ်တာကို တွေရပါလိမ့်မည်။ နို့တစ်အိုးလုံး မပျက်သွားအောင် အစစအရာရာ သတိထား သန့်သန့်ရှင်းရှင်း လုပ်ဖို့ အညွှန်းကို အတိအကျ လိုက်နာဖို့တော့ လိုပါလိမ့်မည်။

၂၀၀၉ ကုန်ပြီး ၂၀၁၀ ကိုကူးတော့မည်။ ၂၀၁၀ ဆိုတာ လူတိုင်းအတွက် ရထားတဲ့ နို့အိုး အသစ်တစ်လုံးစီ ဆိုပါတော့။ ဒီနို့အိုးတစ်အိုးနဲ့ ဘာဖြစ်အောင် လုပ်မည် ကြံထား စီမံထားတယ် ဆိုပါဦးတော့ ၂၀၀၉က လက်ကျန် ဒိန်ချဉ်လေး တစ်ဇွန်း နှစ်ဇွန်းဖြင့် ထည့်လိုက်ရင်တော့ ၂၀၁၀ မှာလည်း နောက်ထပ် ဒိန်ချဉ် တစ်အိုးပဲ ဖြစ်လာဦးမှာပါ။ တခြား အထွေးအထူးတော့ ဖြစ်လာဦးမည် မထင်။ ကိုယ်ရထားတဲ့ နို့အိုးလေး မချဉ်မသိုးသွားရင်ပဲ ပုံမှန်ဖြစ်လာပြီ။ သာမန်ဆန်လှပြီ။

နှစ်သစ်မှာ စိတ်သစ်၊ လူသစ် အကျင့်သစ်နဲ့ စချင်ကြတယ် ဆိုပေမည့် ကိုယ်တစ်ကိုယ်လုံး စိတ်တစ်စိတ်လုံးကို ပြောင်းလိုက်ဖို့ဆိုတာလည်း နတ်ရေကန်ထဲ ခုန်ချသလိုမျိုး မဟုတ်ပြန်။ မြန်မာနှစ်ကူးလို အတာရေနဲ့ ဆေးကြောတာတောင် မသန့်စင်နိုင်တာ စက္ကန့်တံ တစ်ချက် ပြောင်းသွားရုံနဲ့တော့ အစစ အရာရာပြောင်းလဲသွားဖို့ ဆိုတာ စိတ်ကူးယဉ်သက်သက်လည်း ဖြစ်မည်။ စိတ်ဝေဒနာဆန်ဆန်လည်း ဖြစ်ကောင်းဖြစ်မည်။

ဘယ်လိုပဲဖြစ်ဖြစ် ကိုယ်တို့ပဲ သတ်မှတ်ထားတဲ့ ဒီအချိန် အပိုင်းအခြား သတ်မှတ်ချက်လေးကို အခြေခံပြီး နှိုင်းယှဉ် တိုင်းတာမှုတွေတော့ဖြစ်လည်း လုပ်နိုင်သေးတာပဲ။ ၂၀၀၉ မှာတော့ ဒီလောက် ၂၀၁၀ မှာတော့ ဒီလောက်ပေါ့။ ဒီလိုနဲ့ နောက်ကို ပြန်ကြည့်မည်။ ရှေ့ကိုမျှော်ကြည့်မည်။ နောင်တတွေရမည်။ အိပ်မက်တွေ မက်မည်။ ကုန်လွန်သွားတာတွေကို နှမြောမည်။ ဘာတွေလာဦးမလည်းလို့ မတွေးရဲရှိမည်။ေ၀၀ါး ကွယ်ပျောက်သွားတာတွေရှိမည်။ေ၀၀ါး မပီပြင် မမြင်နိုင်တာတွေ ရှိမည်။

ဘယ်လိုပဲ အသစ်ဖြစ်အောင် လုပ်လုပ် လက်ကျန် ဒိန်ချဉ် တစ်ဇွန်းကတော့ ရှိနေဦးမှာပဲ။ အဲဒီ ဒိန်ချဉ်တစ်ဇွန်းနဲ့ ၂၀၁၀ဆိုတဲံ နို့တစ်အိုးကလည်း နောက်ထပ် ဒိန်ချဉ်တစ်အိုး ထပ်ဖြစ်ဦးမှာပါပဲ။ အဲဒီ ဒိန်ချဉ် တစ်ဇွန်းက စိတ်ပုတ် စိတ်ယုတ်လည်း ဖြစ်နိုင်တယ်။ စိတ်ဖျင်း စိတ်ညံ့လည်း ဖြစ်နိုင်သလို စိတ်ကောင်း စိတ်ကြည်လည်း ဖြစ်နိုင်တယ်။ စိတ်တည် စိတ်သန့်လည်း ဖြစ်နိုင်ပါတယ်။ အဆိုးတစ်ခုတည်းကို မဆိုလိုပါဘူး။ ၂၀၀၉ မှာ သင်ယူခဲ့တဲ့ သင်ခန်းစာတွေကလည်း ၂၀၁၀ အတွက် ဒိန်ချဉ် တစ်ဇွန်း ဖြစ်နိုင်ပါတယ်။ ၂၀၀၉ မှာ ကျူးလွန်ခဲ့တဲ့ အမှား တစ်ခုဟာလည်း ၂၀၁၀ အတွက် အရိပ်တစ်ခု ဖြစ်နိုင်ပါတယ်။ အဲဒီ ဒိန်ချဉ်တစ်ဇွန်းဟာ ၂၀၁၀ ဆိုတဲ့ နို့အိုးကို တစ်ခုခု ပြောင်းလဲပစ်မှာကတော့ အသေအချာပါပဲ။

၂၀၀၉က သယ်ဆောင်လာတဲ့ ကန့်သန့်ချက်တွေ၊ အချုပ်အနှောင်တွေကလည်း ၂၀၁၀ အတွက် လက်ကျန် ဒိန်ချဉ် တစ်ဇွန်းဖြစ်သွားမှာပါ။ ၂၀၀၉က လက်ဆင့်ကမ်းလိုက်တဲ့ အခွင့်အလမ်းတွေ အတွေ့အကြုံတွေကလည်း ၂၀၁၀ အတွက် ဒိန်ချဉ် တစ်ဇွန်း ဖြစ်သွားမှာပါပဲ။ အဲဒီ တစ်ဇွန်းကပဲ ၂၀၁၀ဆိုတဲ့ နို့အိုးကို ပုံစံပြောင်းလိုက်မှာပါ။

ဟင်းချက်နည်းမှာတော့ ကိုယ့်မှာ လက်ကျန် ဒိန်ချဉ် မရှိရင် ဘယ်လို လုပ်ရမည်ဆိုတာတော့ ပြောထားပါတယ်။ ဆိုင်မှာ ဒိန်ချဉ် သွားဝယ်ပါတဲ့။ တစ်နေရာရာမှာတော့ ဒိန်ချဉ် တစ်ဇွန်း နှစ်ဇွန်း ရနိုင်ပါတယ်။ နည်းနည်းတော့ ရှာကြံရမည်။ အဖိုးအခလည်း ပိုပေးရနိုင်ပါတယ်။ ၂၀၀၉မှာ ရထားတဲ့ နို့အိုးကို ကောင်းကောင်း ဒိန်ချဉ် မတည်လိုက်နိုင်လို့ ၂၀၁၀ အတွက် အခက်တွေ့နေသူတွေလည်း နီးစပ်ရာ နေရာမှာ ဒိန်ချဉ် နည်းနည်း ရှာဖွေလိုက်ပါ။ အဲဒီ Starter လေး ရပြီဆိုရင်တော့ ဒိန်ချဉ်တွေ နောက်တစ်အိုးပြီး တစ်အိုးတည်ဖို့ဆိုတာ ပထမအိုးလောက် မခက်ခဲတော့ပါဘူး။ ဒိန်ချဉ်တည်ထားနိုင်တဲ့ သူတွေအနေနဲ့လည်း ဒိန်ချဉ် တစ်ဇွန်း နှစ်ဇွန်း ဝေမျှဖိုဆိုတာ ဖြစ်နိုင်ပါတယ်။ ဖြစ်သင့်ပါတယ်။

နွားနို့အိုးထဲ ဒိန်ချဉ်ထည့်လိုက်ရုံနဲ့ ဒိန်ချဉ် တစ်အိုးရမည် ဆိုရင်တော့ သိပ်ကိုလွယ်လွန်းပါတယ်။ လက်တွေ့မှာတော့ အဲဒီလောက် အပေါစား မဆန်ပါဘူး။ ဒိန်ချဉ်လုပ်တဲ့ အခါ အစစ အရာရာ သန့်ရှင်းအောင် သတိထားရပါတယ်။ နို့မဟုတ်ရင်ဖြင့် နို့တစ်အိုးလုံး ပစ်ရသွားပါမည်။ ဒီလိုနဲ့ ပစ်လိုက်ရတဲ့ နို့အိုးပေါင်း ဘယ်လောက် ရှိပြီဆိုတာကတော့ ကိုယ်ပိုင် သင်ခန်းစာပါပဲ။ ဒိန်ချဉ် တစ်အိုး နှစ်အိုးတည်တတ်သွားရင်တော့ အရှိန်ရသွားပြီး နောက်ထပ် ဒိန်ချဉ်အိုးတွေ တည်ဖို့ဆိုတာ အရမ်းကြီး မခက်ခဲတော့ပါဘူး အရေးကြီးတာ ခက်ခဲတာကတော့ ပထမ တစ်အိုး နှစ်အိုးပါပဲ။

ပိုင်နိုင် ကျွမ်းကျင်သွားရင်တော့ ရလာတဲ့ နို့တစ်အိုးကို ဒိန်ချဉ်တင်မက ထောပတ်၊ ဒိန်ခဲ၊ မလိုင် မျိုးစုံ လုပ်နိုင်ပါသေးတယ်။ ကျွမ်းကျင်မှုနဲ့ တခြား Ingredients လေးတွေတော့ လိုပါသေးတယ်။ တစ်ခါလာလည်း ဒိန်ချဉ် နောက်တစ်ခါလာလည်း ဒိန်ချဉ် မလုပ်ချင်ရင်တော့ Recipes နဲ့ Ingredients လေးတွေ ရှာဖွေ စုဆောင်း လေ့လာ သင်ယူနိုင်ပါသေးတယ်။ မြန်မာတစ်ယောက်က နို့တစ်အိုးကနေ Parmesan Cheese လိုမျိုး အီတာလျံဒိန် လုပ်ဖို့တော့ အတော်လေး ခက်ခဲပေလိမ့်မည်။ မဖြစ်နိုင်ဟုတော့ မဆိုလိုချင်ပါ။

နွားနို့တစ်အိုးကနေ ဒိန်ချဉ်အပြင် တခြားအမျိုးအမည် စားစရာ အထောင်အသောင်းမက လုပ်နိုင်ပါတယ်။ ဒိန်ချဉ်မှာတင် အမျိုးရာချီ လုပ်နိုင်သလို၊ ဒိန်ချဉ်တစ်မျိုးတည်း သုံးပြီးတော့လည်း စားစရာ အထွေအထူး မျိုးစုံ လုပ်နိုင်ပါတယ်။ မပျက်မစီး မပုတ်မသိုးဘဲ ဒိန်ချဉ်တစ်အိုး၊ ဒီထက်ပိုပြီး အရသာရှိတဲ့ စားဖွယ် တစ်ခု ဖန်တီးနိုင်ဖို့အတွက် လူတိုင်းရဲ့ ၂၀၁၀ နွားနို့အိုးလေးတွေ အတွက် ဆုမွန်ကောင်း တောင်းလိုက်ပါတယ်။ ။

Film